دى ملوخية للشاعرة ايمان بكرى

من طرف **ابو رقيه** 2010-04-03, 7:37 pm

دى ملوخية

سألت جارتنا أم بهية
جوزها العامل فى البلدية
ما تقوللى يا لفندى يا جوزى
معنى الكلام الأراجوزى
اللى قالوه فى التلا فز يون
ديمراقراطية .. ديرنقاطية
كلمة ما تيجى يوم على بال
واحلف دى شتمة يا عبد العال
قام قالها السيد جوزها
وهى بتمط فى بوزها
ما تبطلوا جهل يا جدعان
ديموقراطية يا بهية
ما تفهمى بقى يا ولية
ديمقراطية .. ديمقراطى
خصم الكلام عند الحاتى
واتعشى على كيلو حراتى
وانا أبوس فى أورطاس طعمية
ديمقراطية ومقرية
فى صحف جرايد مطوية
بتقول نعم بكرة وبعده
ولحد ألفين سنة جاية
ديمقراطية دى لعبتنا
عملوها جدعان حتتنا
عشان ما تحلو صورتنا
ويصدقوا إن عيشتنا
عايمة فى بحور العسلية
ديموقراطية تدلعها
وساعات كتير نلوى دراعها
بس اشترى يوم عتقية
ديموقراطية .. ديموقراطرط
وكلام كتير وبقى مراطرط
والكل مبسوط ومسأطط
ببرباطوسه اللى مناأط
من كيفه بقى ماشى يساأط
على باب حارتنا المنسية
ديموقراطية اتجنن قول
تحيا البقول ويعيش الفول
رزق المدهول على المسطول
والعيشة حلوة مسلية
ديموقراطية هى و موش هية
بس الشبه عشرة المية
تسعة عشان العالمية
احد لمون بالملوخية
ما تسكتى بقة يا ولية
فى داهية روحى انت وهية
دى عشان تفوت الوردية
يموت غفير عشرين ميه
وأعيش خروف من غير لية
وأموت قتيل وما ليش ديه ..